2024 թվականի նոյեմբերի 22-ին Դասագրքերի և ՏՀՏ շրաջանառու հիմնադրամի (այսուհետև՝ Հիմնադրամ) աշխատակազմի մասնակցությամբ Աղվերանում անցկացվեց արտագնա սեմինար՝ հետևյալ օրակարգային թեմաների շուրջ.

1. 1.  2024 թվականի ընթացքում Հիմնադրամի կողմից իրականացված աշխատանքների ամփոփում,
   2. Կառավարման ավտոմատացված համակարգում (ԿԱՀ) իրականացվող փոփոխություններ,
   3. ՏՀՏ անվտանգության հիմնախնդիրներ,
   4. Հիմնադրամի նոր կայքի ներկայացում,
   5. Հիմնադրամի հետագա գործունեության ու նոր նախաձեռնությունների ներկայացում:

Օրակարգի 1-ին հարցի շուրջ խոսեցին Հիմնադրամի գործադիր տնօրեն Գ. Գասպարյանը և մարզային կոորդինատորների ղեկավար Կ. Սեդրակյանը:  Մասնավորապես ներկայացվեցին 2024 թ. Հիմնադրամի կողմից ծրագրավորված ու փաստացի կատարված աշխատանքները, ձեռքբերումները, ինչպես նաև թվայնացված դասագրքերին և էլեկտրոնային կրթական ռեսուրսներին առնչվող խնդիրներն ու դրանց լուծման ուղղությամբ իրականացված գործողությունները: Ներկայացվեցին նաև ըստ մարզերի դասագրքերի ներդրումային գումարների հավաքագրման մասով կատարված աշխատանքները և այդ ուղղությամբ հետագա անելիքները:

Օրակարգի 2-րդ հարցի շուրջ խոսեց Հիմնադրամի ծրագրավորողների թիմի ղեկավար Ա. Սմբատյանը: Նա ներկայացրեց ԿԱՀ-ում իրականացվող հիմնական փոփոխությունների անհրաժեշտությունը, նպատակը և ԿԱՀ բարելավման ուղղությունները, որոնք հնարավորություն կտան համակարգի գործարկումն իրականացնել առավել արդյունավետ և անխափան:

Հիմնադրամի սերվերային համակարգի և դպրոցների հետ կապուղիների անվտանգության ապահովման հարցերի շուրջ խոսեց ոլորտի մասնագետ Է. Չրաղյանը: Նա, մասնավորապես, խոսեց ներկայումս թվային աշխարհին ուղղված հարձակումների ու դրանց տեսակների մասին, ներկայացրեց արտաքին աշխարհից եկող վտանգներից պաշտպանվելու հնարավոր միջոցները, ինչպես նաև ՏՏ անվտանգությանն առնչվող արդի այլ հիմնախնդիրներ: ՏՀՏ անվտանգության վերաբերյալ նյութերին մանրամասն կարող եք ծանոթանալ՝ անցնելով https://bitly.cx/W95n8 հղումով:

Օրակարգի հաջորդ հարցը վերաբերում էր Հիմնադրամի պաշտոնական՝ dshh.am նոր կայքի ձևավորմանն ու գործարկմանը, որը ներկայացրեց Հիմնադրամի ծրագրավորողների խմբի մասնագետ Շ. Հակոբյանը: Նա ներկայացրեց Հիմնադրամի հին կայքի փոփոխությունների անհրաժեշտությունը, նոր կայքի բաժիններն ու դրանց ֆունկցիոնալ հնարավորությունները, կայքում ավելացված նոր գործառույթները, ինչպես նաև՝ կայքի գործարկման համակարգչային, բջջային և այլ հավելվածներն ու կայքի նոր հնարավորությունները: Ներկայացվեց նաև Հիմնադրամի նոր ձևավորված լոգոն (տարբերանշանը):

Սեմինարի ավարտին ամփոփվեցին աշխատանքային քննարկման արդյունքներն ու ներկայացվեցին Հիմնադրամի հետագա գործունեության ուղենիշները, մասնավորապես՝ 2025 թ. իրականացվելիք ընթացիկ աշխատանքներն ու նոր նախաձեռնությունները: